Aldea Nova é o único espazo aberto e vivo dedicado:

• ao desenvolvemento rural sostible de Galicia;
• ao seu estudo, divulgación e experimentación;
• a fomentar o seu goce por parte dos máis pequenos;
• a revelar e potenciar os seus recursos gandeiros, agrícolas, forestais, educativos e turísticos;
• a promover o uso de enerxías renovables e novas tecnoloxías da información;
• a impulsar, en definitiva, a revitalización social, económica e ambiental desas áreas que, alén do límite das cidades, seguen conservando tanto a esencia da nosa cultura como extraordinarios recursos naturais para o futuro.

Non é un reto pequeno. Tampouco o foi, no ano 2007, a posta en marcha deste innovador proxecto. Para a súa materialización o Concello de Narón contou co apoio da Unión Europea a través dun Plan PRODER.

Visitan anualmente Aldea Nova miles de persoas, no seu tempo de lecer ou de formación. Para todas elas o noso equipo de profesionais deseña constantemente novas propostas de actividades, que a miúdo contan coa colaboración de entidades públicas e privadas de Narón e do resto de Galicia. Confiamos en que che resulten de interese.

Agardámoste en Aldea Nova!