Lagoa da Frouxeira e praia de Valdoviño
A 4 km.
Extensa lagoa litoral, protexida do mar por un grande sistema dunar modelado polo vento. A lagoa é fogar de centos de aves acuáticas, adquirindo relevancia como punto de “parada e fonda” durante as migracións de limícolas. Forma parte do Lugar de Importancia Comunitaria (LIC) "Costa Ártabra" e na Zona de Especial Protección para as Aves (ZEPA) "Costa de Ferrolterra - Valdoviño", e polo tanto da Rede Natura 2000 da Unión Europea.
Encoro das Forcadas
A 6 km.
Este encoro é un interesante refuxio de diferentes especies de parrulos. Nel que adoita observarse con facilidade á londra.
Río Xuvia e serra do Forgoselo
A 3,5 km
Extenso tramo do río Xuvia cun importante bosque de ribeira, doado de percorrer polos seus numerosos sendeiros. Ao seu paso polo lugar de Pedroso, o Concello de Narón mantén unha ampla zona de lecer que conta ademais cun cámping e un muíño tradicional musealizado. Forma parte do Lugar de Importancia Comunitaria (LIC) "Xubia-Castro”, ao igual que a máis afastada serra do Forgoselo, caracterizada polas súas brañas, piñeirais silvestres, lobos e néboas.
Río Belelle
A 10,5 km
A súa fervenza é un dos recunchos máis fermosos da bisbarra: o río Belelle precipítase máis de 50 m nunha grande poza rodeada de carballos e castiñeiros.
Lagoa e praia de Doniños
A 20 km
Rodeada por un denso cinto de vexetación acuática, a lagoa de Doniños protéxese do mar polas dunas da praia do mesmo nome. Forma parte do Lugar de Importancia Comunitaria (LIC) "Costa Ártabra" e polo tanto da Rede Natura 2000 da Unión Europea.
Fragas do Eume
A 30 km
Un dos derradeiros grandes bosques atlánticos europeos situados xunto ao litoral, augas arriba de Pontedeume. Constitúe un importante refuxio de diversas especies de fentos presentes en poucs lugares planeta. É Parque Natural e forma parte do Lugar de Importancia Comunitaria (LIC) "Fragas do Eume".
Ría de Ortigueira
A 40 km
Esteiro de extraordinaria beleza e riqueza en biodiversidade. Destacan as súas poboacións de aves acuáticas invernantes e migradoras. Forma parte do Lugar de Importancia Comunitaria (LIC) "Ría de Ortigueira e Ladrido", humidal tamén protexido polo Convenio de Ramsar.
Serra da Capelada
A 28 km.
Os máis de 600 m de altura sobre o mar converten aos seus acantilados nos máis altos da Europa continental. Os seus cumios acollen algunhas especies de plantas case únicas. Forma parte do Lugar de Importancia Comunitaria (LIC) "Costa Ártabra" e da Rede Natura 2000 da Unión Europea.
Estaca de Bares
A 62 km
A partir de finais de verán, e ata ben entrado o inverno, pasan fronte a esta punta centenares de milleiros de aves mariñas cara ao sur. É un dos espectáculos máis sobresaíntes da natureza galega. O propio cabo é un lugar de grande interese etnográfico e natural, e forma parte do Lugar de Importancia Comunitaria (LIC) "Estaca de Bares" e polo tanto da Rede Natura 2000.
Ría do Burgo
A 50 km
En poucos outros lugares de Galicia é posible observar desde tan preto ás aves acuáticas silvestres. E iso, a pesar de estar situado no corazón dunha área densamente poboada, moi preto da cidade da Coruña.
Terra Chá
A 64 km
Esta emblemática e chaira bisbarra do centro de Lugo alberga algúns dos ecosistemas máis escasos de Galicia, entre eles varios humedais de interior cunha notable vexetación. O mazarico real ten aquí unha das súas poucas áreas de cría en España.
Ademais, dispoñemos de dous privilexiados miradoiros sobre o golfo Ártabro
- Miradoiro do monte Esperón, na propia Aldea Nova, a 300 m de altitude, con vistas nocturnas do faro da Torre de Hércules e da lagoa e praia da Frouxeira.
- Miradoiro do monte dos Nenos, a 366 m de altitude, e con vistas de todas as rías do golfo Ártabro. Está a só 400 m de Aldea Nova.
